TALUMPATI - (Filipino: Wikang Mapagbago)

Nakatagpo ka pa ba ng taong matatas manalita sa wikang taktak atin? Nagsasalita ka pa ba ng purong Filipino bilang medyum ng pakikipagtalastasan? Nagagawa mo pa bang kumustahin ang wikang Filipino? Huwag magtataka na baka isang araw, mamumulat ka na lamang sa katotohanang ang ating wika ay nabaon na sa limot ng nakararaming mga Pilipino.

Masalimuot ang naging buhay ng ating wika. Maraming salita ang namatay kasabay ng paglipas ng panahon. Nakakalungkot man sa parte ng mga paparating na siglo ngunit huwag pangangamba sapagkat hindi maaalis ang katotohanang upang umunlad at marating ang tagumpay kung minsan mayroong kailangang bitawan at isakripsiyo habang naglalakbay na maabot ang tagumpay na ito. Upang hindi mapag-iwanan ng panahon, gaya ng taong patuloy na nakikipagsapalaran sa mabilis na pagbago ng lipunan, ang wika ay kinakailangan din makipagsabayan sa pagbabagong ito. Kung kaya’t hindi maiiwasan ang hindi pagkakaintindihan kapag ito na ang ating pinag-uusapan ngunit hindi natin maikakaila na dahil sa wikang ito, nagkakabuklod pa rin tayo. Isa sa ating ipinagmamalaki ang yaman ng ating wika. Ang napakaraming baryedad na patuloy na sumisibol ang siyang mas nagpapaganda sa wikang atin. Kung kaya’t ang tema sa taong ito ay tunay na angkop sa mabilis na pagbabagong nagaganap sa ating wika. Filipino: Wikang Mapagbago. Sa napakaraming salik na nakakaimpluwensiya sa tao, isa narito ang medyum na ating ginagamit sa pakikipag-usap sa ibang tao. Ito ang nagsisilbing tulay upang lahat ng mga dapat ilahad sa kausap ay maiparating nang matagumpay. Mapagbago sapagkat nagkakaroon tayo ng daan upang ang ating mga hinuha at opinyon ay maipahayag gamit ang sariling wika. Nagagawa nito na baguhin ang prinsipyo at pananaw nang nakararami at mapukaw ang kanilang diwa sa kung ano ang tama sa mali at ang dapat sa di dapat. Mapagbago sa aspekto ng estruktura at kahulugan upang makibagay sa panibagong henerasyon. Kailangan ng wika ang kakayahang makibagay upang maging in pa rin sa kabataan sa kasalukuyan. Nakakapangambang isipin ang posibilidad na matulad ang ating wika sa wikang latin na ngayon ay tinatawag nang patay na wika sapagkat wala ng nangangahas na ito’y paunlarin at gamitin. Huwag sana umaabot sa puntong iyon ang ating wika. Ang pagsasalita ng wikang Filipino ay hindi dapat kinakahiya. Nakakapanglumo ang katotohanan na nakatatak na sa isipan ng mga Pilipino ngayon.Tulad na ang basehan na nang talino at estado ay ang bihasa sa paggamit ng lenggwahe ng ibang bansa. Ikaw ay bida kung marunong kang gumamit ng salita ng iba. Nakakabastos sa wikang Filipino. Bakit parati nating isinisiksik ang ating sarili na makiangkop sa ibang bansa na kung tutuusin maging sila ay may pagkamangha sa ating wika. Hindi ito makita ng ibang Pilipino dahil sila ay nagbubulagbulagan sapagkat ang mahalaga sa kanila,  sila ang tinitingala ng nakararaming hindi eksperto sa wikang banyaga. Ayon pa nga kay Propesor Ernesto Constantino, “Kapag nabaog ang pag-unlad ng ating kaisipan gawa ng paggamit ng banyagang wika ay mababaog din ang pag-unlad ng ating wika”. Hindi yayabong ang ating bansa maging ang ekonomiya kung ang ating isipan ay nabulag na ng wikang banyaga. Huwag nating hayaan na balutin tayo ng ibang wika. Ang dapat na nakabaon sa ating isipan ay ang magkaroon ng sariling bantayog ang ating wikang Flipino.

Ako ay umaasa pa rin sa mga panahong darating na mamumulat ang diwa at sistema ng mga Pilipino na ang tunay na basehan ng pagka-pilipino ay ang yakapin ng buo ang wikang Filipino. Samakatuwid, sa kabila ng palihim na pagtatangka sa pagkitil sa ating wika, ito pa rin ay patuloy na mabubuhay at magbabago. Taas noong ipagmalaki sa wikang banyaga na tayo ay hindi aatras na ipaglaban ang wikang tatak atin. Patuloy tayo na mangangahas na lagutin ang kolonyal na prinsipyo na gumagapos sa ating wika at isipan. Magbago man ang lahat lahat, wag lamang ang pagmamahal natin sa wikang tatak atin. Sa pakikibaka na marating ang tuktok ng tagumpay nating Pilipino, huwag sana nating kalilimutan sa mga panahong iyan na isigaw ang wikang Filipino.